Як дзялілі мядзведзя

Шмат цацак ёсць у нашым садзе:

Машыны, лялькі і звяры.

У добрым ладзе ў круг пасядзем,

Гуляем разам, як сябры.

Каму што трэба — цацкі ў шафе,

Для ўсіх адчынена яна.

Бяры ваўка, лісу, жырафу,

Бяры канструктар і слана.

Сказаў аднойчы ўпарты Федзя:

«Нікому Мішку я не дам!»

Мы сталі з ім дзяліць мядзведзя

I падзялілі напалам.

I кожны ўзяў сваю палову,

Але гуляць ніхто не мог.

У Федзі — Мішка безгаловы,

А у мяне — без задніх ног.